Du Jornalet

La cercaira de l’Universitat de Nagoya parlarà de las causidas graficas de Josèp Cantaloba per transcriure los cants populars occitans a l’entamenada del sègle XXJòrdi Ràfols

Tèxte legit

Deman dimècres 21 d’octobre, a 18 oras, l’ostal d’Assesat de Tolosa aculhirà una conferéncia de Naoko Sano, cercaira a l’Universitat Aichi de Nagoya, en Japon. Sano parlarà de las causidas graficas de Josèp Cantaloba per transcriure los cants populars occitans al començament del sègle XX dins sos celèbres Cants d’Auvèrnha. La conferéncia s’inscriu dins lo cicle dels Dimècres Universitaris Occitans e Catalans (DUÒC), organizat per l’Universitat de Tolosa-Joan Jaurés e l’Institut Ramon Llull.

Lo rescontre tractarà dels diferents sistèmas d’escritura de l’occitan a l’entamenada del sègle XX e sus las causidas de Josèp Cantaloba (1879-1957). Lo compositor vivarés reculhiguèt de cants populars de Carcin e de la Nauta Auvèrnha, e entretenguèt de contactes amb los poètas occitans de Lengadòc, Cantaloba se trobèt confrontat a la causida de la grafia per adoptar per las paraulas occitanas de sas òbras. Cantaloba causiguèt fin finala l’utilizacion de mantuna grafia per transcriure las paraulas dels cants qu’aviá reculhits.

Naoko Sano (Tòquio, 1970), es una ensenhaira e cercaira japonesa especializada en sociolingüistica e en lenga francesa. Après aver descobèrt l’occitan en Japon, perseguiguèt una partida de sos estudis a l’Universitat de Montpelhièr per tal d’aprene la lenga nòstra, que la conduguèt cap a un trajècte novèl. En 2004, acabèt un estudi sus las motivacions de las personas qu’utilizan l’occitan, a partir d’una enquista menada al près de participants als corses de la Chambra d’Òc. Lo meteis an, recebèt lo prèmi de la Vocacion Provençala. Es tanben l’autora d’un vocabulari occitan-japonés.