Jornalet, gaseta occitana d’informacions

Cinc nòus recorses son estats depausats per de particulars dins los departaments de Gers, Corresa e Dordonha per denonciar la preséncia d’un gas cancerigèn dins l’aiga potabla: lo clorur de vinil monomèr (CVM). Segon las informacions reveladas per France Inter lo 14 de març de 2026, aqueste gas, classificat coma “cancerigèn certan”, es relargat per de vièlhas canalizacions en PVC pausadas dins los ans 1970.

Segon l’avocata Gabrièla Gien, lo problèma tòca sustot las zònas ruralas, en particular los vilatges situats en cap del ret de provesiment. «Aquí, la demanda en aiga es mai febla e lo gas CVM a tendéncia a estagnar, çò que fa créisser la concentracion», çò explica.

Al total, un trentenat de particulars an ja depausat de recorses contra aquesta pollucion de l’aiga. D’autras proceduras judiciàrias èran ja estats iniciadas en d’autres lòcs de l’estat: doas associacions del departament de Sarta en octòbre de 2025, e dins lo departament de Loiret en abril de 2025. Dins aqueste darrièr cas, dètz usatgièrs avián atacat lor sindicat de las aigas, estimant aver recebut en coneissença de causa una aiga polluida.

En Peiregòrd, après l’alèrta d’un particular, lo distribuidor d’aiga Suez afirma aver procedit sul pic a una purga de las canalizacions concernidas, abans de remplaçar lo tròç incriminat. Totun, un engenhaire del país, a l’origina d’un dels recorses, denóncia lo fach que «malgrat que se sàpia que las gents bevon una aiga potencialament polluida ne son pas prevengudas».