A començat una campanha de micromecenatge per un darrièr disc de Claudi Martí. Entitolat Retorn, es un album d’estudi, en format numeric e en vinil, del grand cantautor occitan Claudi Martí, qu’amassa sas grandas cançons revistas per el meteis e sos musicians.

Dins sos 82 ans, Martí torna un còp de mai per parlar totjorn del país que vòl viure, sostengut pel labèl catalan Sota la Palmera, conegut per la Guida de Viatge pel cançonièr occitan d’O.C. Brigada Internacional.

Amb aqueste projècte son ara tres los darrièrs micromecenatges occitanofils de la plataforma catalana Totsuma. Fa gaire, lo CAÒC capitèt ben una campanha de collècta d’argent per sas activitats e a l’ora d’ara es en linha la campanha per la segonda sason del videopodcast País Invisible, qu’explica l’occitan e Occitània al public catalan.