Julié matinié…

PierreDominique Testa, lou 6 juillet 2010.

Qu’este matin fai fres aqui sus la verdesco

Si chala de l’eigagno sout la triho entrebesco.

Lou jour enca paurous, pecaire, rouselin

Aujo pas pintourla de blu aperalin

Lou pue de Garlaban, lou Taoume, Testo-roujo

Tant la nue soubeirano vòu regna darriéroujo.

Mai iéu que dourmiéu pas encavo d’un cousin

Que ve, voulastrejav’ à l’entour moun couissin

Mèntre que mi viravo encagna de sèis alo

Que fasien mai de brus que quatre prouvençalo

Charrant, lei bassarèto, lou jour de soun marcat,

Mi levèri garèu qu’aviéu pas rèn d’un gat.

Qu’es bouen de senti l’aire bouleguiéu de l’aubèto

Frusta soun couers viesti sounco d’uno barreto.

L’eigàgi de la nue, douço pluèio de blin

Mouissèjo touto fuèio, gasto lei gau-galin.

Abas au galinié, lou gau si deriviho.

Mando soun cant dei fouart que nous trauco l’auriho !

Entèndi au valoun lou dindat dei toupin

Que lei vaco gansàion au mitan dei grand pin.

Leis aucèu dins lei barto bandìsson soun ramàgi,

E iéu leis escoutant, crési soun badinàgi.

Siéu tout afachini, sàbi pus destria

S’es lou roussignòu lou miour engaubia,

Vo s’es la cardelino, la petouso, lou chi,

Qu’emé sèi solfo longo mi làiss’ embabouchi.

Subran dins lou fourni, dins l’espés la baragno,

Destràucon douei couniéu pega de teleragno,

Que pastùsclon, lei fouele, coumo de fouletoun,

Que l’èrbo sout sèi pas, si móuvèj’ en vetoun.

Alouro tout suspres pèr aquesto naturo

Que s’esbroufo, s’eigrejo toujour à voues escuro,

Siéu óublija de dire d’afourti sèns bestour,

Que tout acò d’aqui qu’a tant de resplendour,

Noun pòu èstre que l’obro d’un quaucarèn de grand,

Que tant li metrian lou noum de Soubeiran :

Lou Bouen-Diéu que mestrèjo l’esperit la matèri,

Pastant emé l’ Amour lou bouen coumo l’arlèri.

PierreDominique Testa, lou 6 juillet 2010.