Se sarra la 20a edicion de Passa-Pòrts; lo festenal comengés de la cultura occitana se tendrà ongan a Sant Gaudenç del 24 al 29 de març.

Espelit en 2004 a Montrejau, Passa-Pòrts es ara un festenal conegut e reconegut. S’agís d’una veirina de la cultura occitana que s’adreiça als occitans, que sián occitanofòns o pas, per far reviure la passion de la cultura e de la lenga del país.

Ongan, lo programa prepausa una seguida d’activitats culturalas dont de jornadas per escolans, de quilhas gasconas, de projeccions, de gimcanas, d’animacions, d’espectacles d’umor, d’escape games, de conferéncias, d’obradors de dança, de cants e de musica, de cantèras, de repaisses e de concèrts.

L’eveniment combina d’activitats pedagogicas, d’espectacles e de moments de convivialitat per promòure las lenga e cultura occitanas.