»
(Fèlis Gras, magistrat, cougnat de Roumaniho, nascu à Malemort-dóu-Comta lou 3 de mai de 1844 e mort à Avignoun lou 4 de mars de 1901)
Pamens lou calabrun arribavo. L’ivèr es tout d’abord la niue. La biso, boufavo mai aigro. Alin, à l’ourizount, uno longo ligno roujo raiavo lou nivo gris e marcavo que lou soulèu èro à mand de se coucha. Alor lou cèu, la mountagno e touto la planuro, qu’èron resta tout lou jour grisastre, n’en devenguèron vióulet, lis aubre, li bouissoun desfuia, li roucas fuguèron subitò rouginas, la briso calè un moumenet pèr faire ounour au coucha dóu soulèu, un reinard japè eila sus l’autre travès. E tout d’un tèms la sournuro agouloupè tout.
Alor sourtiguère de ma bouissounado e escalère lou travès embouscassi de la coumbo ; coume arribère sus lou cresten : Brrou ! ausiguère davans mi pèd coume lou brut d’un toumbarèu de calado que se vuejo ! Èro un vòu de perdis que destourbave de sa couchado. Fuguère lèu remés de l’esfrai e tremoulant de fre dins ma pèu viouleto davalère vers la plano.
M’aplantave souvènt. La mendro roucassiho, uno mato d’avaus, un clot de ferigoulo, tout me semblavo un ome agroumeli, à l’espèro. Mau-grat li rounflado e li quilet de la biso, me semblavo que li caiau en barrulant souto mi pèd fasien un brut d’espetacle. Ges d’estello au cèu, sèmpre lou nivoulas gris que tapavo tout. La niue èro sourno, pamens destriave tout à moun entour. Nàutri, li paure, li bèn paure, ié vesèn la niue. I’avié ges de troupèu deforo tant fasié fre. Pamens quand fuguère sus lou travès que doumino la Nesco, en visto dóu castèu de la Gàrdi, me semblè d’ausi rena li trueio dóu marqués, e de vèire varaia lou fanau dis pourcatié dins lis escour.
Avançère plan-plan, retenènt moun alen, mai fasiéu trop de brut sus la clapeirolo, alor me boutère à quatre piauto, caminant sus li geinoun e sus li man à la rebalado. Arribère sus la pouncho de la roco, e, lou còu estira, testejère sus l’abime.
Pour lire la traduction en français et la transcription en occitan dit classique, merci de cliquer sur le lien