La vila de Rodés acaba son òbra de desoccitanizacion de l’Estivada. La comuna anóncia qu’ongan organizarà, en partenariat amb France Télévisions, tres jorns de concèrts amb “de caps d’aficha de granda renomenada” luènh de l’Estivada de las darrièras annadas. Es a dire que la desoccitaniza completament jos l’escampa que lo festenal “atira pas vertadièrament las molonadas, e sustot la joventut, afeccionada de musica actuala”, çò rapòrta Centre Presse Aveyron.

De fach, dempuèi que Patric Roux quitèt la direccion de l’Estivada d’un biais estranh, en 2015, la comuna prenguèt en carga l’eveniment en lo degradant de mai en mai e ne fasent una marrida gestion. La pervèrsa expulsion de Roux foguèt lo trescòl d’una tièra de dificultats que la comuna rodanesa portava cada an. Dos ans abans, en 2013, lo conselhièr general per Rodés Èst, Bernard Saules, aviá retirat 75% de la subvencion a l’Estivada e o aviá anonciat a la velha del festenal, jos l’argument que l’organizacion del festenal aviá pas presentat la documentacion a temps e que s’atribuissiá pas cap de subvencion als eveniments gratuits. Ara, après sèt ans de degradacion e de marrida gestion, la comuna se planh que i aja pas pro de public e considèra que lo cal desoccitanizar per atraire las folas.

Mas cresèm qu’es justícia de remembrar cossí èra l’Estivada abans que la comuna ne s’apoderèsse de sa gestion; e amb aquel remembre qu’es justícia de nos batre, coma occitans, per recobrar aquel espaci indispensable per la cultura nòstra, a Rodés o endacòm mai. Nos daissem pas tòrcer.

Pendent dos decennis, la capitala de Roergue veniá tanben la capitala de tota Occitània. Las entitats occitanistas i èran totas. De las Valadas fins a las Landas, totes los accents e totas las sensibilitats de l’occitanitat i èran presentas. Tanben las institucions publicas de totas las regions, de las Valadas e d’Aran sostenián aquel eveniment, ont la còla de Dètz TV, e tanben los mèdias occitans, i bastissiam un imaginari nacional occitan normalizat. L’assisténcia del public èra positiva, de desenas de milièrs de personas participavan als concèrts del temps que prenián consciéncia de lor occitanitat. Pendent sos primièrs vint ans, los responsables de l’Estivada foguèron capables de manténer lo festenal mai important de la cultura occitana al marge de las manòbras partidistas e dels assages de patrimonializacion. L’Estivada èra un endrech de confluéncia e d’unitat ont ensems fasiam viure la cultura e a la lenga occitanas. En sèt ans tot aquò s’es desmantelat.

Permetrem que nos rauben aital aquel oasi d’occitanitat? Desvelhem-nos e organizem-nos per lo recobrar al prètz que siá! 

                                                           Editorial de Jornalet ( 29 de genièr de 2023 )