ENCARA CIUTADANS ?  Occitania en Scèna, organisme culturau de la nòstra Region, publiquèt aqueste genièr una crida a candidatura pel projècte “Aver una votz” dins l’encastre d’una Southern Coalicion de 10 païses d’Euròpa de sud. L’objectiu es de fargar de « creacions artisticas participativas e d’estrategias inclusivas de mediacion culturala“ per ”lo dialòg amb las communautats d’acuèlh daus grops d’estajans locaus ». De segur aquelas indicas claras dins un estile leugièr devon levar sulpic un vam d’imaginacion creatriça. Per completar lo tablèu lo dorsièr emai sos complements (istoric dels candidats, plancardas, autras creacions…) devon èsser sonque en anglés. Tot aquò fa perpensar fòrt. Primièr : remarcar la pertinéncia bèla que la primièra qualitat per “Aver una votz” amb las populacions d’Euròpa de sud siá de mestrejar d’a fons l’anglés. Puèi ven una question : cossí se fa qu’aquestes organismes ajan pas de reviradoiras, que n’i a de plan bonas ? Aprèp ne mesuram la clara leiçon : tu Sothern d’Euròpa, sens un excellent anglés siás pas un ciutadan europenc e ta Region te va confirma. Ne seguís la tristesa : es per n’arribar aquí que nos an ruinada la nòstra lenga d’òc ! Enfin ven la confirmacion : las institucions culturalas d’aicí son sempre en dabans per liquidar la diversitat bio-lingüistica.

                                              Cronica de J.L Blénet ( Midi Libre del 5 de fébrièr )