Totòm a Vilafranca de Roergue JORNALET

Publié le 5 septembre 2025 par Joan Pèire LAVAL — Laissez une réponse

Totòm a Vilafranca de Roergue!

Après dètz ans de silenci, torna una granda manifestacion per l’occitan. Los 25 e 26 d’octòbre a Vilafranca de Roergue, la societat occitana es convidada a viure una dimenjada festiva e revendicativa amb una manifestacion, de concèrts, de cantèras, de passacarrièras e un vilatjòt dels païses occitans.

De nòstre caire, Jornalet sosten sens condicion aquela crida. Quand s’agís de manifestar per l’occitan, nos importa pas qual convòca, ont se fa o qual i parla: çò essencial es que la manifestacion siá una capitada bèla, perque la fòrça de la mobilizacion es lo messatge que recebon ciutadans, los elegits, los jornalistas e los partits politics. Los organizaires nos mòstran qu’an un esperit jove e innovant e aquò nos encoratja. A mai, lo simbòl de rebastir l’ostal de Joan Petit, coma una accion de preservacion de la memòria istorica, nos remembra que, per saber ont volèm anar, nos cal saber d’ont venèm, mai que mai dins un ambient de negacion e alienacion.

Avèm una escasença preciosa: mostrar que l’occitanisme se sap mobilizar al marge de las divisions. Recampem-nos dins una demostracion de fòrça civica, festiva e pacifica. Lo succès dependrà solament de cadun de nosautras e nosautres.

Per tant, fasèm una crida clara: totòm a Vilafranca de Roergue! Venètz dire fòrt e clar que l’occitan es viu e nos aparten a totes.

En octòbre, la paraula serà nòstra. Anem, òc, totes amassa!ç

P.S. Se podètz, ajudatz amb la canhòta dels organizaires. E se vos demòra encara un pauc d’argent e de vam, sostenètz tanben Jornalet, que cada jorn fa viure la lenga per escrich.

#paisnostre